माझिया जिवलगा ...

१) विसाव्यासाठी ..

अलिकडे स्वप्न डसत नाही
सय सलत नाही,
जीव जडत नाही
की ऊर भरून येत नाही ..

समोर तटस्थ उभे आहे
पर्णहीन झालेले एक झाड
जे फ़ळत नाही, फ़ुलत नाही
बहरत नाही मी मोहरत नाही

हिरवळीच्या वाटेने जाताना
आपले काहीही नसण्याचे
दुखणे अनावर जागे होते ..

... तेंव्हा खास विसाव्यासाठी
ह्या झाडाची निवड केली आहे ...

२) संवादाला ...

.. पाचूच्या ह्या नवख्या बेटावर
माणसांपेक्षा झाडेच भेटतात
पाहिजे अन् तेंव्हा तिथे ...

बिनकामाचे अन् अव्यवहाराचे
सांगावे आजकाल कुणापुढे?

मुकपणे मग संवाद जमे
झुकून सळसळणार्‍या
ह्या मित्रापुढे ...